تخربيشات

في انهجة المدينة العربي و في زناقيها ... قدام حوانتها و ديارها... تسرح بخيالك و تطير بأفكارك .. تخزر لكل حيط و لكل باب و كل حجرة ... و تسمع القران خارج من حوانتها و ناس تتوكل على ربي ... تزيد شوية تولي تسمع موزيكتنا و فننا المزيان... تقول هذي بلادي الي نعرفها.. و هاذا شعبي الباهي الي نعرفو.. تتذكر تاريخ كبير تعدى عليها .. و ايامات عز وقتلي كانت الدنيا دنيا و الأخلاق أخلاق... وقتلي كان الناس لبعضها و الرحمة بيناتهم... وقتلي تسمات البلاد تونس على خاطرها كانت توءنس الي يدخللها... اما احنا وين و الشيء هذا وين ؟!.. تخرج من غادي.. تخرج من احلامك و سرحتك و خيالك... تعاود ترجع لواقعك و الي صاير في بلادك.. فوضى.. صياح.. عياط.. دخان كراهب.. تزمير.. وسخ .. كلام زايد.. انت فين و بلادي الي توءنس فين ؟! انت فين و بلاد التاريخ و الحضارة فين؟! بلاد خارجة من سياق التاريخ.. بلاد في شيرة و الحضارة في شيرة... بلاد نسبوا فيها رجال الي صنعت التاريخ.. و نمجدوا فيها مزابل التاريخ... بلاد نحبوا فيها الكذاب السفيه.. و نكرهوا فيها الصادق الي عندو ...

على خاطرني تونسي و نحب بلادي و بابا و امي حطوا صبعهم في الحبار الازرق و انتخبوا المجلس التأسيسي على خاطر انتوما صوت الشعب و انتوما الي تمثلونا نطلب منكم طلب هو صغير بالنسبة لشهاريكم اما حلم حياتي نحب سبادري نلعب بيه السبور نعرف الي انتوما غاطسين في مشاكلكم ... نقصد مشاكلنا خاطركم تنوبونا و تسهروا على راحتنا نعرف الي وقتلي احنا راقدين في الليل انتوما تباتوا تسهروا، في المجلس التاسيسي و الا في الوتلة فيبالي بيكم انتوما تكتبولنا في دستورنا بش تسطرولنا مستقبلنا الزاهر فيبالي الي ماكمش قاعدين تلعبوا .. مستقبل بلاد ساهل هو ؟ اما ميسالش خوذوا بخاطري نحب سبادري نلعب بيه السبور اي ماما قالتلي الي زدتوا و بش تزيدوا في شهريتكم و منحكم و شنوة المشكل قاعدين تتعبوا الحق متاع ربي و تعبكم ما يتقدرش بثمن خوذوا ميسالش فلوسنا هي فلوسكم مالا باش نوابنا انتوما تعرفوا تتصرفوا فيها خير منا، انتوما نخبتنا و تاج ريوسنا شعملتولنا في الدستور خالتي محرزية ؟؟ مازال اي اي عندك الحق المليح يبطا عمي مصطفى قالولي اولاد الحومة الكبار الي بش يشريولي سبادري نلعب بيه السبور كي تخدموهم...