سبادري نلعب بيه السبور

على خاطرني تونسي و نحب بلادي و بابا و امي حطوا صبعهم في الحبار الازرق و انتخبوا المجلس التأسيسي

على خاطر انتوما صوت الشعب و انتوما الي تمثلونا

نطلب منكم طلب هو صغير بالنسبة لشهاريكم اما حلم حياتي

نحب سبادري نلعب بيه السبور

نعرف الي انتوما غاطسين في مشاكلكم ... نقصد مشاكلنا خاطركم تنوبونا و تسهروا على راحتنا

نعرف الي وقتلي احنا راقدين في الليل انتوما تباتوا تسهروا، في المجلس التاسيسي و الا في الوتلة

فيبالي بيكم انتوما تكتبولنا في دستورنا

بش تسطرولنا مستقبلنا الزاهر

فيبالي الي ماكمش قاعدين تلعبوا .. مستقبل بلاد ساهل هو ؟

اما ميسالش خوذوا بخاطري نحب سبادري نلعب بيه السبور

اي ماما قالتلي الي زدتوا و بش تزيدوا في شهريتكم و منحكم

و شنوة المشكل قاعدين تتعبوا الحق متاع ربي و تعبكم ما يتقدرش بثمن

خوذوا ميسالش فلوسنا هي فلوسكم مالا باش نوابنا انتوما

تعرفوا تتصرفوا فيها خير منا، انتوما نخبتنا و تاج ريوسنا

شعملتولنا في الدستور خالتي محرزية ؟؟

مازال

اي اي عندك الحق المليح يبطا

عمي مصطفى قالولي اولاد الحومة الكبار الي بش يشريولي سبادري نلعب بيه السبور كي تخدموهم

شعملتوا فما خدمة و الا لا ؟؟

 !لا

اي اي عندك الحق وضعية صعيبة و فلوس ما فماش و الطريف الي فما خذاوهم النواب بش يكون مستقبلي و مستقبل شعبي باهي

عمي الرئيس نسمع في الناس يقولوا عليك حقوقي و كنت تحارب على حقي و حق الشعب

تعرف قالولي زادة الي انتي تتبرع بشهريتك بش يخدموا الناس و يعاونوهم

امان تتبرعلي بسبادري نلعب بيه السبور

ما تنجمش كيف الجماعة ؟

ميسالش

قبل كنت نسمع في ماماتي، مرا كبيرة تقول في برشا كلام

"نتذكر منو جملة توا فهمت شنوة معناها : " ما يحس الجمرة كان الي عافس عليها"

فهمت الي كذبتوا على بابا و امي و خالي و عمي و اولاد حومتي و ماماتي

فهمت الي كذبتوا علينا الكل و ماكمش تخمموا فينا

فهمت الي تحبوا الكرسي و الفلوس

و اخر حاجة تخمموا فيها هي انا و اخواتي

اما ميسالش نعرف الي قبل الانتخابات بش تجيوا و تعطيوني سبادري

اما ما نيش بش ناخذوا

ماعادش حاجتي بيه السبادري، نمشي حفيان و نطلع راجل خير ملي تذلوني بسبادري

اي تذكرت حاجة بش نقولها للي قال " التونسي للتونسي رحمة "

جملة قالتها ماماتي اكا المرا الكبيرة "ما يبكيلك كان شفرك و ما يندبلك كان ضفرك"

[م.ب]