تخربيشات

البارح حلمت حلمة ندرا كيفاش اما وقتلي قمت مالنوم عاودت غمضت عينيا و حبيت نرجعلها ياخي ما نجمتش لقيتها وفات .. حلمت الي انا في بلاصه كلها ڨازون ما نعرش جاتني تشبه لساحة حقوق الانسان و الا ساحة باستور .. برشا ناس موجودين غادي . عباد نعرفهم و عباد ما نعرفهمش .. برشا نشطاء مالمجنمع المدني و نشطاء على الانترنات .. فيهم اصحابي و فيهم الي نعرفهم اما عمري ما حكيت معاهم و فما الي ما نعرفهمش جملة.. الي كان يجمع بين الناس الموجودين لكل الي هوما شباب .. و موش اي شباب . الشباب الي هازز على كتافو هم البلاد و مشاكلها.. الشباب الي كان ديما موجود في اي تحرك و اي مظاهرة و اي عركة تخص قضايا البلاد و العباد .. الشباب الي شادد كفنو في يدو و متسعد يضحي على خاطر البلاد و يحارب عليها بالامكانيات الي عندو .. ريت الشباب هذا ملموم حلقات حلقات و يحكي و يفدلك و الناس لكل فرحانة.. حسيتها الفرحة خارجة من عينيه و ظاهرت في وجه كل واحد ريتو كل واحد حكيت معاه .. ما نجمتش نتذكر علاه كنا ملمومين و علاه كنا فرحانين .. اما كي خممت لقيت برشا حاجات تجمعنا و برشا حاجات كان تتحقق بش تفرحنا هك...

1- تهريب رأس النظام لامتصاص غضب الثوار. 2- تعين رئيس مجلس نواب النظام وصي على املاك النظام 3- بعد تجدد الاحتجاج تخلع رئيس وزراء النظام و تنفض الغبار على تحفة من تحف النظام و تعينها رئيس وزراء 4- التحفة المكلفة بحماية النظام تنظم انتخبات و يربح فيها اكثر من عارض النظام في العلن و هادنه في السر. 5- تتكون حكومة من المعارضة المهادنة للنظام المدعمة ببقايا النظام 6- تستغل غباء و طمع الحكام الجدد لتكون حزب معارض لهم من كوادر النظام. 7- تحرك وسائل اعلام النظام لتلميع صورة النظام و تمييع كل مطالب المحاسبة و القصاص من النظام. 8- تساهم في كتابة دستور توافقي يحمي النظام 9- تشارك في انتخبات يسوق لك فيها اعلام النظام انك المنقذ من الفوضى و الخراب 10- تربح الانتخبات و تعين رئيس حكومة من بقايا النظام. و هكا النظام اجهض ثورة قامت على النظام. الخلاصة : بين النظام و النظام ما قعد كان الشعب مظام . [م.ب]