...

البارح حلمت حلمة ندرا كيفاش اما وقتلي قمت مالنوم عاودت غمضت عينيا و حبيت نرجعلها ياخي ما نجمتش لقيتها وفات ..

حلمت الي انا في بلاصه كلها ڨازون

ما نعرش جاتني تشبه لساحة حقوق الانسان و الا ساحة باستور ..

برشا ناس موجودين غادي .

عباد نعرفهم و عباد ما نعرفهمش ..

برشا نشطاء مالمجنمع المدني و نشطاء على الانترنات ..

فيهم اصحابي و فيهم الي نعرفهم اما عمري ما حكيت معاهم و فما الي ما نعرفهمش جملة..

الي كان يجمع بين الناس الموجودين لكل الي هوما شباب ..

و موش اي شباب .

الشباب الي هازز على كتافو هم البلاد و مشاكلها..

الشباب الي كان ديما موجود في اي تحرك و اي مظاهرة و اي عركة تخص قضايا البلاد و العباد ..

الشباب الي شادد كفنو في يدو و متسعد يضحي على خاطر البلاد و يحارب عليها بالامكانيات الي عندو ..

ريت الشباب هذا ملموم حلقات حلقات و يحكي و يفدلك و الناس لكل فرحانة..

حسيتها الفرحة خارجة من عينيه و ظاهرت في وجه كل واحد ريتو كل واحد حكيت معاه ..

ما نجمتش نتذكر علاه كنا ملمومين

و علاه كنا فرحانين ..

اما كي خممت لقيت برشا حاجات تجمعنا و برشا حاجات كان تتحقق بش تفرحنا هكا ..

عباد مالجهات الكل و مالطبقات الكل و مالتوجهات الفكرية الكل ..

لمهم هم مشترك و هدف سامي ..

حاربوا عليه و تعبوا عليه ...

و خذاو منو في وقت مالاوقات شوية

و في وقت اخر الشوية الي خذاوه يحبوا يسرقوه منهم ..

اما هو ما سكتوش ..

في الحلمة حسيت الي اللمة هاذي و الفرحة هاذي ما تكون على حاجة ..

..كلنا نحبوها تتحقق و نهارتها تحققت ...

و انا قايم من فرشي جات غناية في بالي و دندنت بالمقطع هذا :

نِحْلِمْ وانا صـاحِي يا صندوق عجبْ

يا جْناحِي يا جْناحي والريشاتْ ذهَبْ

بَكِّي، والاّ فَرّحْ داوِينِي والاّ اجْرحْ

غِيرْ خَلِّينِي نسْرَحْ نسْرحْ كِيفْما نْحِبّ

[م.ب]