تساؤلات سكيزو-فارينية

فما برشا جماعة يطحنوا للحكومة و كأنها جات من كوكب آخر، نفس العباد هاذم كانوا مع الاتحاد و دعموه في قيادته للحوار الوطني، و الاتحاد توا بش يبدى في المطالبة بالاجور و اظرابات و غيرو.

سؤال1 : شنوة بش يكون موقفكم من الاتحاد ؟؟

برشا ناس دعموا ديودونيه Dieudonné في الحملة الشرسة الي صارت عليه و هذا جيد، نفس الناس هاذم يساندوا في الوزيرة الجديدة و قالك شنوة المشكل كان مشات للكيان الصهيوني .

سؤال2 : لاباس ؟ انفصام في الشخصية و الا ڨريپ ؟؟

نقعدوا مع وزيرة السياحة، قالت ضحات بمنصب كبير في سبيل تونس و اكا اللوغة و الناس تپرتاجي و عاملين حملة مساندة و غيره، ياخي الوحيدة الي خلات منصب ؟اغلب النواب و الوزراء الي كانوا في الخارج خلاو مناصب و شركات و لم نرا حتى واحد ذلنا على منصبوا الي خلاه.

سؤال3 : يا شعب شبيكم تموتوا على الطحين للي يذلكم ؟

ولد الكانز كي تشد على غناية البوليسية كلاب لكلكم ساندتوه و وليتو اصحاب مواقف و داعمين للحرية و و و ..و ياسين العياري كي قال للكلب المنذر ثابت انتي كلب و تحكم عليه ب6 شهور حبس مارينا حتى كلب ملي كانو ينبحوا على حرية الرأي قال الحكم هذا ظالم ..

سؤال 4 : النفاق الي عندكم خليقة و الا صنيعة ؟؟

الڨصاص ملي بدا المجلس التأسيسي و هو عامل شاطح باطح و يسب في الناس لكل و عامل الفضايح و يسب في نائبات النهضة و محرزية و انتوما تصفقولوا و تقولوا روح الشعب، كي تكلم بالمنطق متاعوا المعتاد مع وزيرة السياحة الجديدة لكلكم سبيتوه.

سؤال5 : توا فقتوا بالقصاص همجي و حيوان ؟ و الا كان وليدنا ظرب وليدكم هذا حال الصغار و كان وليدكم ظرب وليدنا شام النهار ؟

عامين و انتوما تسبوا في التأسيسي و في نقاشات الدستور تبعوا و تسبوا فيهم و تقول دستور فاشي و دكتاتوري و دستور النهضة و و ..

و في الجلسة الي صادقوا فيها نفس النواب الي كنتوا تسبوا فيهم على نفس الدستور الي كنتوا تسبوا فيه، فرحتوا و بكيتوا و سيبتوا كم هائل من الوطنية على الفايس بوك ..

سؤال6 : والله مالقيت ما نسأل ...

حاصيلو ..

كل واحد يستنتج وحدو، انا كثر عليا الشيء ...

و قوم نحرق هالمدينة و نعمر واحدة أشرف، قوم ننسى هالزمان و نحلم زمن ألطف

[م.ب]