حكايتي معاها
نحبها
نحب نكلمها كل يوم
نحب نسمعها صوتي كل يوم
نحب نكتبلها و تقرالي
نحب نحكيلها و نفرغ قلبي على صدرها
نحبها تسمعني كي نشكي و نبكي
كي نفرح و نزهى
نحبها تسمعني كي ننصحها
و الثنية الباهية نوريها
نحب نلقاها كي تطيح بيا
تشدني من يدي و تقيمني
تمسحلي دمعتي و ترضيني
تاقف معايا و تعاوني
نحب و نحب و نحب
اما الحقيقة
موش كيما نحب
*********************
في الحقيقة قبل كانت مع واحد
قالتلي عليه باهي و متفتح و ناس ملاح
عاونها و خرجها من مشكلة كبيرة صارتلها عندها سنين
جاها و لقفها في طمبك المشاكل
و عاونها بش تقوم من اول و جديد
(هذا شنوة قالتلي ...)
LOVE طاحت فيه
المنقذ مالا وينك
الاعوام لولانين تعداو عسل في عسل
حب و وئام و وفاق
عاطي ماعندو السيد و ظهرلها الي هي الكل في الكل
ما يمشي كان رايها و ما يسمع كان كلامها
ارادتها هي الكل
ما تعداوش برشا اعوام
و السيد تقلب و ظهر على حقيقتو
وجه السوق تنحى و ظهر وجهو الحقيقي
السيد ولا كل يوم يظرب فيها
و شهريتها ياخذلها فيها
ولى حاطط ساق على ساق و يأمر فيها
و بالسيف عليها ولات تتسلف و تتداين بش تخلصلو شيخاتو و بلعاتو و نزواتو
حاصيلو عمل فيها الي ما يتعملش
و الشيء كل عام ماشي و يزيد
ولى يجيبلها في جماعتو
يفرهدو بيها في رواحهم
و مصروفهم و جوهم عليها
و هي كل يوم "اجبد ما ترد الجبال تتهد"
و هوما
مولا الدار موش هوني و بالعكس زايدين على قدام
لا رأفوا بيها و لا سخفوا عليها
استغلال، استغلال، ابتزاز
...مالا جميعة طاحو بيها
*********************
فدت، عبات، عبات، استحملت، عضة على قلبها، صبرت
و هوما لا رحمة لا شفقة
ماعدش تنجم تستحل و يلزمها تقلبها على ريوسهم
اما وحدها ما تنجمش
هزت التاليفون و طلبتني، تحبني نعاونها
و انا بالرغم الي عملتو الكل
جريتلها
على خاطرني نحبها و نعشقها
عاونهتها بش دڨدڨناها على راسو و راس جماعتو
...حاصيلو ما برد على قلوبنا الا ما هرب
*********************
هي فرحت و انا فرحت و فرحت و فرحت
قلت اخيرا رجعتلي و ماعاد يخطفها مني حد
قعدنا مع بعضنا
حكينا مع بعضنا
حبينا بعضنا
حاولنا نرجعو شويا من ايآتنا الي ضاعت و احنا بعاد
بدينا نبرمجوا لمستقبلنا مع بعضنا
مستقبل خير ملي تعدا
مافيه كان الحب و الغرام
مستقبل نكتبوه بإدينا
و كي نحققوه
الماضي لكل و الي ضاع الكل و الي تكسر لكل
يتنسى و يتفسخ
تعداو ايامات و اشهرة
و انا طاير، حالم فرحان
ما نجمش نوصف شنوة حسيت وقتها
تفاهما على النهار الموعود
النهار الي بش تولي فيه ليا و نولي فيه ليها
الى الابد
(هكا مخي شنوة صورلي و قلي وقتها ..)
المهم ما نطولش عليكم بالحديث
النهار الموعود جاء
و انا فرحان و طاير
و هي فرحانة
و الاحباب و الاصحاب و الناس لكل فرحانين
راهو نهار ستنيناه عندنا سنين و سنين
و انا و هي و الناس الكل واقفين
جبدتني على جنب و قالتلي:"عندي ما نحكيلك"
قلتلها:" انا زاده عندي برشا حكايات بش نحكيهملك"
قالتلي:"اسمعني حكاية موش كيما الحكايات الكل"
قلتلها:"ان شاء الله خير"
قالتلي:" انا فسدت برشا في حياتي و خالطت برشا و طحت و قمت و عملت برشا عمايل ما تتعملش .. و توا جاء الوقت الي بش نتوب فيه و نتلم، اما ما نجمش هذا معاك انتي، انتي ما تنجمش توفرلي الي انا مستنيتو بش نتوب و نرجع لربي و نظف الي تمسخ و نصلح الي تكسر"
و هزت روحها و مشات
و انا نخزرلها و ما نجمت نعمل شيء لا نخلط عليها لا نشدها من ايديها
جمدت في بلاسطي و ما نجمتش نتحرك
مرة اخرى تمشي و انا نخزر
...مرة اخرى تظيع من ايديا و انا نخزر
*********************
الحاصل
بعد ايامات، بعد ما فقت شويا مالصدمة
فركست عليها
قالولي ولات مع سيدنا الشيخ
اكا الراجل الي عدا عمرو و هو يخدم في الخارج و يكون و ما عندوش برشا ملي رجع للبلاد ..
بعد سنين مالغربة جاء و خذاها
و انا سنين بحذاها و مقطع روحي عليها و كي استحقتني لقاتني
و بعد خلاتني و مشاتلو
بداو كالعادة عسل في عسل و هو يدور بيها من بلاد لبلاد
و يفرهد فيها مع العباد
اما كلو وفق ما يرضاه الله
مشاو عملو عمرة نظفوا بيها وسخ سنين
و مشاو لقطر تفرهدو في اطار اسلامي
لا فيه فساد و لا فيه خنار
و بداو يدوروا في البلدان الاسلامية
و مشاو حتى للبلدان الغربية اما كل وفق ما يرضاه الله
هي فيبالها يفرهد فيها
بش ينسيها عذاب سنين
اما سيدنا الشيخ خبيث
يدور بيها و يعرض فيها
يحضر في الوقت الي بش يبدا يخدم بيها
و هي بالي راتو في حياتها لكل
غريبة كي ما فاقتش بإلي يحب يعملو سيدنا الشيخ مالاول
الحاصل
ايامات تعداو
و بعد بدا الظرب
سيدنا الشيخ ما ستناش سنين بش يبدا يخدم بيها
ايامات كاهاو
و بداو الكليونات يجيو للدار
هاو شيوخة بجبايب و لحي
هاو امراء جايبين الدزة معاهم
جماعة مكستمين مالاوروپ
تي صيتها وصل حتى للامريكان
لكل جايين يحبو يعديو وقيت
و كل واحد جايب الدزة
اما ما تتفجعوش
كلو وفق يرضاه الله
كثر عليها الدهك
فاقت فيسع بإلي في مخ سيدي الشيخ
اما المرة هذي تربطت ربطة خايبة
غرقها في الديون و كان تبوجي يدخلها للحبس و يحطمها
السيد طلع خبيث علي قبلو
لا نفع فيها انا نعاونها
لا نفع فيها ولاد الحومة لا شيء
الشيخ عندو الدزة و جماعتو ما يبيعوهش
*********************
ما وصلو لحل بعد ما تدخلو الناس الكل
حتى مالقديم تدخللها عن طريق جماعتوا و اصحابوا
عطاها لواحد صاحبو
قالو عليه لا تابع الجديد لا تابع القديم
وحدو دوبو دوب روحو
خدام على روحو
مالدار للخدمة و مالخدمة للدار
الزايد ما عندوش
صحاب مع الناس الكل
هي رضات بيه
هم اهون من هم
هي لتوا مازالت معاه
اما حتى هي ماهيش خصيصة
فاقت باللعبة الي تتلعبلها
خبرة سنين مالا وينك
و السيد الجديد ماهوش خصيص
توا راقدلها حلفة اما ما تعرفش عليه وقتاه يقوملها
ظربت اخماسها في اسداسها
و بدات تبعث في ميساجات لصاحبها لول
هذاكا الي مرمدها و عمل فيها
هي في مخها
الي نعرفو خير ملي ما نعرفوش
و هذاكا مجربتو و تعرفو على شنوة يمشي و على شنوة يجي
بدات تربط في خيوطها من جديد
و موش عارف وين وصلت معاه
ما تنعتش الحكاية
اما الحاصل لتوا مازالت مع النظيف العاقل الخدام
*********************
انا هاني نخزرلها من بعيد
و قلبي دم
موش عارف العيب مني و الا منها
موش عارف انا الي ما عرفتش كيفاه نعجبها و نخليها معايا
و الا منها الي ما تحبنيش و ما نعجبهاش
خطوة لقدام و خطوة لتالي
موش عارف نصدم و نحرقها على ريوسهم الكل القديم و الي بعدو و الي بعدو و نخطفها
و الا ناقف و نسلم امري و نرضى بالي تكتبلي
حرت و حار دليلي و الي في القلب في القلب
..و لي جابتو ساقيه العصى ليه
م.بوستة
PS: الاحداث الواردة بهذا المقال خيالية و لا تمت للواقع بصلة و اي تشابه بينه و بين الواقع فهو اغرب من الخيال"البرنامج"
Commentaires
Enregistrer un commentaire