"خوذ ڨاورية تهنيك و لا تونسية تتشرط عليك"

"خوذ ڨاورية تهنيك و لا تونسية تتشرط عليك" حملة انخرط فيها مجموعة كبيرة من الشباب التوانسة و كيما كل فينومان على الفايسبوك يكثر السب و تبادل التهم بين الاطراف المختلفة .. المجموعة الي عملت الحملة لو انهم ركزوا مثلا على فئة البنات الي تبدا تتشرط هي و عايلتها على العريس و جيب و اعمل و نحب و ندرا شنوة و شبيها بنت خالتي خير مني و اشبيني قطعة حبل هاززها الواد و يحكي على التمرميد الي يعيشو الشاب التونسي بش يخلط يعرس.. كان ينجم يكون للحملة متاعهم معنى .. لكن ان الحملة تولي سبان و ثلب و قلة تربية (بالطبيعة هذا موش غريب على التوانسة) و تحقير للمرأة التونسية الي بالسيف عليكم يلزم تحترموها لانها فرضة روحها في المجتمع و قاعدة تحارب في عنصرية و تمييز من مجتمع ذكوري بإمتياز بحب يحطها تحت السباط و يفرض عليها الي تعملوا و الي ما تعملوش استنادا الى عادات و تقاليد بالية .. الي يسبو في المرا التونسية ما يلزمهمش ينساو الي امهم الي ولدتهم و رباتهم و كبرتهم و تعبت عليهم و سهرت الليالي مرا تونسية .. اختهم الي كي تطيح بيك تمشي تشكيلها و كي تستحق فلوس تتسلف من عندها و ما ترجعش .. مرا تونسية .. المعلمة و الاستاذة الي قراوك و خرجوك مالجهل (لو انو النوعية هذي ما نتصورش خرجت مالجهل) نساء توانسة .. و الطبيبة الي تداوي .. و صاحبتك الي تبدا تتمسكن قدامها نساء توانسة زادة .. فلذا اذا انت تحس في روحك ناقص ما ترميش المسؤلية على غيرك و بالطبيعة في تونس المرا لحمتها حلوة الناس لكل ينهشوها كي تطيح بيهم .. بالطبيعة كلامي هذا ما ينزهش المرا و يخليها هي ضحية خاطر فمى برشا نساء هوما الي خلاو الرجال تتكلم هكا ( بالطبيعة اضافة الي موروثهم الثقافي الخامج) و النساء هاذم هوما الي شيئو المرا و خلاوها سلعة تشترا و تباع من شروط زواج مجحفة و طلب مهر و غيرو و تبدا تتجبد على الزوالي و تفركس فإلي عندو الكرهبة و الدار و الفلوس .. الي خلى الرجال يفهمو الي المرا كيفها كيف اي منتوج استهلاكي كان عندك فلوس تشريها كان ما عندكش شم و تعدى ... ملاحضة: الڨاورية الي تحب تاخوها بش تهنيك راهي ماهيش بش تغسلك ساقك كي تروح للدار كان ما فيبالكش و ماهيش بش تصبر عليك كي تبدا ما تتهزش بمقص النار و رد بالك تقول الي فحولتك هي الي بش تخليها مكبشة فيك على خاطر فمى دراسات علمية قالو الي فما برشا شعوب تفوق العرب فحولة ..

تحياتي ..