يا حسرة كي كنت نحلم

وقتلي صار الي صار ...

و خرج الشعب و ثار

و صاح و عيط و دافع على حقو ...

وقتلي قال لا ..

و عرا سدروا للكرتوش ...

وقتلي الشعب يد وحدة و واقف مع بعضو في الخير و الشر ... حلمت حلمة ...

حلمة بمستقبل مزيان

و شعب فرحان ...

حلمت بخير يعم

و شعب ناسي الهم ...

حلمت بدولة الكرامة

و الي يحكمها يحفض الامانة ...

حلمت بالشهيد يضحك في جنتو

و يقول تضحيتي ما مشاتش خسارة...

حلمت و حلمت و حلمت ...

في ليلة و نهار

فقت مالحلم ...

فقت و تصدمت بالواقع المر

"ما يندبلك كان ضفرك و ما يبكيلك كان شفرك " يا شعبي ...

سلمت امانتك و رقبتك لناس همها كان الفلوس ...

كلاولك دنيك و قاعدين يتصحروا بآخرتك ...

نساو دمك الي سال

و نساو صوتك الي صاح

و نساو الغاز الي شميتو

و الظرب الي كليتو

نساو كل شيء في سبيل حتى شيء ...

نساو الي " الأيام نداولها بين الناس" و "لو دامت لغيرك لما آلت اليك" ...

و انت يا شعبي ..

وين مشيت ؟؟

موش كنت يد وحدة ؟؟

موش كان الجار لجارو و الصاحب لصاحبو و الخو لخوه ؟؟

شبيك نسيت هذا الكل ؟

شبيك تفرقت و تشتت ؟.

شبيها كلمتك الوحدة ولات كلام ؟

و شبيها وقفتك الوحدة ولات وقفات ؟

و شبيها يدك الي ظربت بيها الظلم وليت تظرب بيها في روحك ؟؟

حالك يا شعبي يبكي الحجر ...

يا حسرة كي كنت نحلم ...

و يا ليتني قعدت نحلم ...

[م.ب]