#مانيش_مسامح

نحكيو على بلاد شاددها الباجي
عاش حياتو يلاجي
من حجر لحجر ما يعياشي
كي كبر و هتر و عطاه الوقت و حكم
و دور بيه كمشة سكم بكم
دبرو عليه يصالح و السراق يسامح
بعث كلابو للشارع
و قلهم انبحوا و صيحوا
و لموا معاكم الي يميحوا
و اقنعوا الشعب يصالح
و الا البلاد بش تولي اتعس من البارح
و ماعادش بش تخلط عالماكلة و حتى الماء لا
انتشروا في التلافز
و داروا من برنامج لبرنامج
الي يدافع عالفساد
و الي يندب عالقفة
و الي يبكي عالعلفة
يسخايلونا مازلنا في وقت الغفلة
خرجولهم فروخ صغار
مخاخهم مخاخ كبار
و قالولهم #مانيش_مسامح
و مانيش ناسي
الي خلاو الشعب يساسي
و الي مصوا دم الزوالي
و الي فقروا و ذلوا و خربوا
عمري ما نسامح
و خاف الباجي و هستر
و خرج للشعب و توعد
و بالجيش هدد
و كلابوا من شيرة لشيرة
قال شنوة بالديمقراطية سيمر
و نساو الي الشعب قال على جثتي لن يمر
و الشعب الي قال لا
و خبز و ماء و بن علي لا
ماعادش يخاف مالتهديد و الوعيد
غدوة بش يخرج و يصيح
مانيش_مسامح#
و #قانونك_ما_يتعداش
كي تجيب برهان و ڨراش
و مادام فيا روح عمري ما نسامح

[م.ب]