وحتى كان مشى ..

كنت ديما نقول الي العمر اقصر من انك تعديه في الهم و الغم و المشاكل .. و الكره و الحسد ..

و الي يلزم نحبوا حياتنا و نتجاوزوا اي شيء ينجم يكدر صفو حياتنا ..

و الي حياتنا قصيرة بش نقعدوا نقيدوا في الاغلاط الي عملوها الناس في حقنا و نتسائلوا علاش و كيفاش صار الي صار و نتغبنوا على ناس اختفات فجأة من حياتنا بدون سبب ..

و كنت ديما نسعى لتطبيق هذا ولو نسبيا و كنت نسميها la sélection naturelle الي الحياة قاعدة تعمل في فرز للناس الي دايرين بيا و تنحيلي في الناس الي مايصلحوليش بش تفرغ لبلاصة للناس الي نجم نكمل بيهم حياتي ..

لكن وقتلي تصير اغلاط في حقك من ناس موش كيما الناس الكل، اشخاص كنت تعتقد الي عندك مكانة خاصة عندهم و انت تعتبرهم عزاز عليك وكانو في وقت مالاوقات قراب ليك و قيموك كي طحت من غير ما تطلب منهم ..

ماتنجمش تتجاوز الحكاية بسهولة ، ما تنجمش تعمل الي مستانس تعملوا انك تتجاوز و تقيد على sélection naturelle على خاطر موش الناس الكل كيف كيف ..

تقعد تسائل بينك و بين روحك علاش الشخص عمل هكا ، تحاول تتذكر شنوة الي عملت معاه بش يخليه يتصرف بالطريقة هذيكا و ما تلقاش،

تحاول تتذكر حواراتك معاه، لقائاتك، اي حاجة عندها علاقة بيه فماش حتى détail صغير يخلي الإنسان هذا تصرف بالطريقة هذيكا معاك .. ماتلقاش ..

توصل تسأل المعني بالأمر و ما تلقاش إجابة ..

برشا حاجات نجمو نتجاوزها و حاجات ماتنجمش و مرارتهم تقعد خاصة كي يكونوا حكايات وقفوا في الشطر من غير سبب ..

كي الفرحة الي ما كملتش

كي الصغير الي مابكاش كي تولد

كي الروح المغدورة الي تقعد في الارض حتى تكمل مهمتها ..

أما ميسالش كي انسان يستحق حاولوا تكبشوا للخر فيه ..

وحتى كان مشى ..