Let it hurt

بعد شهر اعتكاف و تاملات و قعدات مع روحي و حكايات و حوارات استخلصت شوية حاجات حبيت نشاركها معاكم و بعد نمشي على روحي :
- رد بالك تحب خاطر المحبة وجيعة للي يحب و للي يتحب.
-حاول ما تأملش في حتى حاجة على خاطر وجيعة خيبة الأمل ما ينجم يداويها شي ..
- ما تربطش سعادتك بحتى شخص و الا بحتى حاجة على خاطر في نهار مالنهارات الي ربطت بيه سعادتك ينجم يمشي، يختفي، يتنحى و وقتها بش تتوجع برشا .
- ما تخلي حتى انسان ياثر عليك في قراراتك المصيرية و الا ياخو قرار في بلاصتك على خاطر الاحساس بالندم الي بش تحسو وقتلي يكون القرار هذاكا غالط بش يوجعك برشا و بش يوجع الشخص الي اثر عليك و الا خذا القرار في بلاصتك ..
- تعلم تكون مسؤول بش نهارة الي بش يصير قرار غالط تتحمل مسؤولية و ما ترميهاش على عاتق غيرك .
- ما تعمل على حد, عمل كان على روحك على خاطر نهار مالنهارات الشخص الي معمل عليه ينجم مايكونش موجود و الا ما يكونش لاهي و الا ماعينوش بش يكون معاك في لحضة معينة و وقتها بش تحس بوجيعة كبيرة ..
- كون باهي مع الناس الكل و عاون و اعطي لغيرك شحنة من الحياة و الحنان و الامل اما ما تستناش retour خاطر الي تعمل فيه نابع من انسانيتك و ما يقتضيه عليك وجودك كإنسان ..
- ما تكونش خايب مع الناس و ما تكونش انت البادي بالغلط أما إذا غلطوا في حقك عاملهم بالمثل و الا أكثر شوية ماكش عيسى ابن مريم بش تعطي خدك الآخر تزيد تاكل عليه كف .
تي حاصيلو
في صورة ما اغلب الحاجات الي كتبتهم الكل ما مشاوش كيما انت تحب النتيجة بش تكون وحدة هي الوجيعة و الوجيعة هي أكثر احساس خايب في هالوجود
لذا إذا توجعت عيش وجيعتك و ما تتقواش على روحك و تقنع روحك الي انت قوي و ما ياثر فيك شي
Let it hurt
Until
It can't hurt anymore
ونهارة الي بش تتغلب عالوجيعة هذي حتى حاجة ماعاد تنجم تأثر فيك في الدنيا و وقتها تتولد من جديد ..

و الا انسى الي قلتوا الكل و اعطي وقتك و جهدك و طاقتك لروحك دون غيرها و حاول انك تقدم بحياتك و تطور من روحك خير ملي تهدرها في حاجات أخرى على خاطر وقتلي تستزف طاقتك على غيرك نهارة الي تطيح ماكش بش تلقى جهد تقوم على ساقيك ...

منشور حدو غدوة الصباح و بعد نرجع لاعتكافي و تاملاتي ...
تصبحون ..